الرئيسية
ولد صلاح جاهين فى 25/12/1930 م بحى بشبرا فى شارع جميل باشا.
وصلاح جاهين هو الأكبر بين إخوته.
والده المستشار بهجت حلمى الذى تدرج فى السلك القضائى بدءً من وكيل نيابة حتى عُين رئيساً لمحكمة استئناف المنصورة.
كانت ولادة صلاح جاهين متعثرة تعرضت أثنائها والدته للخطر، فوُلد شديد الزرقة دون صرخة حتى ظن المحيطون أن الطفل قد ولد ميتاً،
ولكن جاءت صرخة الطفل منبهة بولادة طفل ليس ككل الأطفال.
وكانت لهذه الولادة المتعثرة تأثيرها، فمن المعروف أن الولادة المتعثرة تترك آثارها على الطفل فتلازمه طول حياته وقد تتسبب فى عدم استقرار الحالة المزاجية أو الحدة فى التعبير عن المشاعر - سواء كانت فرحاً أو حزناً، وهو ما لوحظ فى صلاح جاهين الذى يفرح كالأطفال ويحزن لدرجة الاكتئاب عند المصائب.
بدأ صلاح جاهين حياته العملية فى جريدة بنت النيل ، ثم جريدة التحرير.
وفى هذه الفترة أصدر أول دواوينه "كلمة سلام" فى عام 1955.
وفى منتصف الخمسينيات بدأت شهرته كرسام كاريكاتير فى مجلة روز اليوسف ، ثم فى مجلة صباح الخير التى شارك فى تأسيسها عام 1957، واشتهرت شخصياته الكاريكاتورية مثل قيس وليلى، قهوة النشاط، الفهامة، درش وغيرها من الشخصيات.
لقد كانت رسوم صلاح جاهين الكاريكاتورية مؤثرة للغاية، لدرجة أنها تسببت أكثر من مرة فى أزمات سياسية عديدة كان من أبرزها اختلافه مع الشيخ الغزالى بالكاريكاتور عند مناقشة مشروع الميثاق فى عام 1962، فاستباح طلاب الأزهر دمه وتظاهروا وتجمهروا أمام جريدة الأهرام.
كما أجرى معه المدعى العام الاشتراكى تحقيقاً بسبب كاريكاتيراً انتقد فيه تقريراً حول نتيجة التحقيق فى شأن تلوث مياه القاهرة.
كما كان صلاح جاهين على شفا دخول المعتقل، فقد وُضِع اسمه على رأس قائمة المعتقلين أكثر من مرة - نظراً لما يعرف عنه من ميول يسارية ونقداً للنظام - لولا تدخل الرئيس جمال عبد الناصر شخصياً لحذف اسمه خمس مرات من هذه القائمة.
وخلال تلك الفترة لم تتوقف أعمال صلاح جاهين الشعرية، فأصدر ديوانه الأول "كلمة سلام" عام 1955، ثم ديوانه الثانى "موال عشان القنال" عام 1957 وفى نفس العام كتب "الليلة الكبيرة" أحد أروع إبداعاته والتى لحنها له سيد مكاوى أحد أقرب أصدقاؤه.
لقد مثلت الفترة الممتدة من 1959 حتى 1967 فترة النضج الشعرى عندصلاح جاهين والتى بلغت قمتها بصدور ديوانه "الرباعيات" عام 1963، ثم عام 1965 حين أصدر ديوانه"قصاقيص ورق"، وخلال تلك الفترة كتب صلاح جاهين أروع أعماله الوطنية التى تغنى بها العديد من المطربين ومنهم عبد الحليم حافظ مثل "صورة"، "بالأحضان"، "والله زمان يا سلاحى" الذى اتُخذ النشيد الوطنى المصرى إبان حكم الرئيس الراحل جمال عبد الناصر، وغيرها من الأعمال الوطنية التى بقت راسخة فى ذاكرة الشعب المصرى.
وفى الفترة ذاتها كون صلاح جاهين جماعة "محبى ضوء القمر" عام 1961، كما قدم العديد من المسرحيات مثل "القاهرة فى ألف عام"، وكتب الأغانى والأشعار للعديد من المسرحيات مثل "إيزيس"، و"الحرافيش"، ولم يتوقف إنتاجه عند الأعمال المحلية، بل قام بالترجمة والإعداد مسرحياً لبعض المسرحيات الأجنبية مثل "الإنسان الطيب"، "دائرة الطباشير القوقازية".
كما قدم الأغانى والأشعار للعديد من الأعمال الإذاعية مثل أغانى مسلسل "رصاصة فى القلب". وعرفاناً منها بأعماله المتميزة للأطفال - مثل مسرحيات "الفيل النونو الغلباوى"، "الشاطر حسن"، "صحصح لما ينجح"، "حمار شهاب الدين"، والعديد من الأغانى والصور الغنائية للأطفال - اختارته وزارة الثقافة - عام 1962- ليكون مسئولاً عن كل ما يتصل بتوجيه الطفل وثقافته.
وانضم صلاح جاهين فى مارس 1964 لأسرة جريدة الأهرام ليكمل مسيرته فيها.
كما نال صلاح جاهين وسام الفنون فى عيد العلم عام 1965.
وعن هذه الفترة يقول صلاح جاهين
عندما سُئل عن اجمل فترات العمر:
"هى الفترة ما بين عام 1963-1967 ... الفترة دى كانت الذروة فى حياتى".
ولكن جاءت هزيمة 1967 لتكون بمثابة الضربة القاسمة لـصلاح جاهين ، فأصيب بعدها بالاكتئاب الذى لازمه حتى وفاته.
وخلال هذه الفترة توقف عن كتابة الأغانى الوطنية؛ حيث اعتبر نفسه مشاركاً فى الهزيمة بأغانيه وأشعاره شديدة التفاؤل والحماس للثورة ولزعيمها جمال عبد الناصر، فلم يكن صلاح جاهين محباً لعبد الناصر فقط، بل كان مبهوراً به يراه قادراً على تحقيق مالم يستطع أى زعيم وطنى آخر تحقيقه.
وعن حبه لعبد الناصر يقول: "أنا وقعت تحت مغناطيسية الكاريزما الموجودة فى شخصية عبد الناصر، ولكنى تعلمت أن انظر إليه بموضوعية..".
ولكنه استعاد توازنه وكتب من وحى حرب الاستنزاف "الدرس انتهى" بعد الهجوم الإسرائيلى على مدرسة بحر البقر، و"عناوين جرانين المستقبل" إثر الهجوم الإسرائيلى على مصنع أبو زعبل.
ثم توقف عن الكتابة فترة طويلة كتب بعدها "المصريين أهمه" وكانت آخر أعماله الوطنية.
ورغم الحالة النفسية التى كان يمر بها صلاح جاهين، إلا أنه تغلب على آلامه واستطاع بقلب عليل تثقله الأحزان أن يزرع فى كل واحداً منا بذرة الأمل والتفاؤل والبهجة، فلم يستسلم وقرر أن يطرق أبواباً جديدة، فلم يكن المسرح والكاريكاتير والدواوين أن تسع موهبة صلاح جاهين المتدفقة كشلال لم تستطع أشد المصاعب أن توقفه، طرقصلاح جاهينباب السينما والتلفزيون ولم ينتظر حتى تفتح له الأبواب فقد كانت مفاتيحهما السحرية فى يده لينطلق بنا فى عوالم درامية، غنائية، واستعراضية.
فقدم للسينما سيناريوهات أفلام "خللى بالك من زوزو"، "أميرة حبى أنا"، "عودة الابن الضال"، و"شفيقة ومتولى".
كما قدم للتلفزيون سيناريو وحوار مسلسل "هو وهى"، فوازير "الخاطبة" و"عروستى"، استعراض "الأسانسير"، "هاشم وروحية"، وغيرهم الكثير.
وقام صلاح جاهين بالتمثيل فى بعض الأفلام مثل "جميلة بو حريد"، "اللص والكلاب"، "شهيدة العشق الإلهى"، "لا وقت للحب"، وآخرها "المماليك".
ولكنه لم يكمل فى هذا المجال.
وعن أدواره فى السينما يقول: "كل الأدوار اللى عرضت على، كانوا بيختارونى عشان وزنى فقط ... أنا دخلت مجال التمثيل من باب الفضول".
انا عينى/
●أنا عينى شافت ساعة رملية
تنام تقوم ترتد مملية
ولقيتها ح تعيش عمر طال أو قصر
وح تنكسر.. تشبه تمام ليا
عجبى!
●اسكت على أمريكا واللى أصابها
فى ثلاثة م الرواد أعز شبابها
قال لى باخاف من خنجرى وأنا شايله
دى القوة يا ما بتجنى على أصحابها
أربـع إيـديـن عـلى الفـطار
أربـع شـفايف يشربوا الشاى باللبن
ويـبوسوا بعض ويحضنوا نور النهار
بـين صدرها وصدره وبين البسمتين
ويحـضنـوا الحب اللى جمعهم سـوا
على الفطـار
ويحـضنوا الشمس اللى بتهز السـتار
وتـخش من بـين الخيوط وبعضـها
مع الهــوا
للأودة تـرسم نفسـها عـلى أرضها
عـلى البساط اللى اشتروه مع الجهاز
على الغرام اللى اشتروه من غير تمن
وعلى القـزاز
ويـشربـوا الشــاى باللــبــن
فى فنجالـين
عــلى الفـطار أربــع إيـديـن
ودبلتـــين
بيـصـحُّوا قـلبى كل ليلة فى المنام
وبـيكتـبولى بـلـون منَـور فزدق على الهـوا الاسود وع الجفن اللى نام
كلمة "سلام"
الشوارع حواديت
الشوارع حواديت
حواديه الحب فيها
وحودايه...عفاريت
اسمعي يا حلوة لما اضحكك
الشارع دا كنا ساكنين فيه زمان
كل يوم يضيق زيادة عن ما كان
اصبح الآن بعد ما كبرنا عليه
زي بطن الأم مالناش فيه مكان
الشوارع حواديت
حودايه الحب فيها
وحودايه...عفاريت
اسمعي يا حلوة لما أضحكك
اسم مصر
على اسم مصر التاريخ يقدر يقول ما شاء
أنا مصر عندي أحب وأجمل الأشياء
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر
مصر النسيم في الليالي وبياعين الفل
ومرايه بهتانة ع القهوة .. أزورها .. واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دموعي في كمي ومن ساعتها وعيت
على اسم مصر
أنا اللي اسمي حتحـور .. أنا بنت رع
مثـال الأمـومـة ورمـز الحـنـان
تفـيض حـلمـاتي وتمـلا الـتـرع
وتسـقـي البـشـر كلهـم والغـيـطان
نهايته يا مصر اللي كانت أصبحت وخلاص
تمثال بديع وانفه في الطين غاص
وناس من البدو شدوا عليه حبال الخيش
والقرص رع العظيم بقى صاج خبيز للعيش
وساق محارب قديم مبتورة ف أبو قرقاص
ما تعرف اللي بترها سيف والا رصاص
والا الخراب اللي صاب عقل البلد بالطيش
قال ابن خلدون أمم متفسخة تعيش ليش
وحصان صهل صحى جميع الجيش
على اسم مصر
النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد
على اسم مصر
مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
أسمعها مهموسة والا أسمعها مشخوطة
شبكة رادار قلبي جوه ضلوعي مضبوطة
على اسم مصر
وترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أو حيحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد أقوله لحد
القمح ليه اسمه قمح اليوم وأمس وغد
ومصر يحرم عليها .. والجدال يشتد
على اسم مصر
لللشاعر الكبير عم الشعراء صلاح جاهين
اوبريت
الليلة الكبيرة
*********
بنات:
قبة سيدنا الولي دول نوروها .
محلا البيارق والناس بيزوروها .
قبة سيدنا الولي في الجو عالية.
محلا البيارق لما نوروها.
بائع:
حمص حمص
تل ما ينقص
عالنار يرقص.
يرقص يرقص
ويقول .
اللي شاف حمص ولا كلش .
حب وتلوع ولا ولا طالش.
فتاة:
يسترك هات حبه بقرش.
الجميع: هاهاهاها.!
بائع:
حمص حمص ....الله
طعمية ,
الله ... الله... باللوز,
الله ...عجمية الله....
اراجوز ,
الله ....
المجموعة:
الليلة الكبيرة ياعمي والعالم كتيرة.
ماليين الشوادر يابه
م الريف والبنادر.
دو فلاحين ودول صعايدة
دول من الكانال ودول رشايدة.
الليلة الكبيرة ياعمي والعالم كتيرة.
العمدة:
ياحضرة الاراجوز قول لي ,
الاراجوز:
نعم ياعمدة عاوز ايه .
العمدة:
منين يروحوا لمتولي ؟
الاراجوز:
امدح نبينا وصلي عليه .
العمدة:
اللهم صلي عليه.
الاراجوز:
تمشي كده على طول على طول .
لحد ماتلاقي عمارة.
تدخل يمين تسأل بتاع فول
دكانته على ناصيه حارة.
المجموعة:
دكانته على ناصيه حارة.
تدخل يمينك في شمالك..
شارعين وفي التالت تفتر
على اليمين واخد بالك
وتمشي على طول تتمخطر.
العمدة:
وامشي على طول واتمخطر!,
الاراجوز:
تفضل كذا تمشي وتدب ..
وتخش من مطرح ما طلعت
ولما تلقى مقلب لب .
العمدة:
ولما القى مقلب لب .
يارب انك تهت وضعت !
العمدة:
دي وصفه هايله , دي وصفه سهله .
المجموعة:
مع السلامه , مع السلامة ,
مع السلامة يابوعمة مايله .
مع السلامة يابوعمه مايله
لاعب البخت:
فتح عينك , تاكل ملبن .
فينك فينك , تاكل ملبن.
اوعى لجيبك .. لاالعيب عيبك
, قرب ... جرب ... نشن
وسطن ايدك وسطن.
إضرب..
(البندقية: طاخ!
اللاعب:
يحميك يابني تبقى غالبني.
قرب خد لك حتة ملبن.
بائع:
فريرة للعيل..
يابو العيال ميل.
خد لك سبع فرارير..
زمارة.. شخليلة..
عصفورة ياحليلة..
طراطير ياواد طراطير!
المعلن:
الليلة السيرك تعالوا دي فرجة
تساوي جنية . قولوا هيه..
بمناسبه هذا المولد يوجد
برنامج سواريه... قولوا هيه .
في السيرك شجيع يهجم ع السبع
ويركب دغري عليه ...قولوا هيه ..
وبنات قمرات زي الشربات
حلوين مش عارف ليه... قولوا هيه.
بائع:
سمك مقلي كل وبرق لي! صنف زي اللوز.
بائع:
استخار واختار
فشه أو ممبار .
يالله سمي وكل.
عجوز:
اسعى , اسعى , اسعى .
مصوراتي :
خد لك صورة سته ف تسعه .
العجوز:
اسعى , اسعى , اسعى.
قهوجي:
يا سي عجورة النار خسعة!
فلاح:
ناس من بلدنا هناك اهم.
روح يابراهيم انده لهم.
سلامات سلامات سلامات ..
سلامات ع البلديات.
فلاح:
دي الحضرة والذكر انجلى.
يالله بنا نذكر ياوله.
المنشد:
شفت ف منام صاحب المقام .
ده ابهه.
المجموعة: ده ابهه .
المنشد:
ويمامه حايمه عليه تسبح ربها .
المجموعة:
يانور النبي ...يانور النبي.
المنشد:
ميلت فوق يده وجيت احبها .
المجموعة:
أحبها .
المنشد:
صحوني م النوم
خدت بعضي وتني جي
تني جاي... تني جي.
الجميع : الله حي.
زفة المطاهر.
نساء:
يأم المطاهر رشي الملح سبع مرات .
في مقامه الطهر خشي وقيدي سبع شمعات.
أطفال:
ياعريس ياصغير .
علقة تفوت ولاحد يموت .
لابس ومغير وح تشرب مرقة كتكوت.
في القهوة
المعلم:
بالذمة دا سابع عيل.
مزفوف من وقت قليل.
القهوجي:
مولد شيلالاه يامعلم . عقبال اولادك.
المعلم:
كلمِ.
نداءات:
واحد مضبوط واتنين مصري.
القهوجي :
ع النار حاضر جايلك دغري.
يوزع تحيات:
مسا التماسي يا مسا التماسي
ياورد قاعد على الكراسي.
نداء:
هات شاي يا دقدق .
القهوجي:
عيني وراسي.
يدخل الريس حنتيرة مغن القهوه الصعيدي.
الجميع:
سمعنا ياريس حنتيرة ..
للصبح معاك السهيرة.
سمعنا.... سمعنا .
حنتيرة:
ياغزال ياغزال
ده العشق حلال
دوبتني دوب
خلتني خيال
ياشفتك فص فراوله
وانا لاقوه ولا حوله
شقلبتني عقلي علاولة
اه ياغزال
يارب ياعلم بالحال
تهدي حبيبي ويصبح عال
واغني وارقع بالموال
آه يا غزال
المعلم:
وقف ياريس حنتيرة .
في ناس هنا قاعدة كتيرة .
ولاحد قال هات تعميرة
ولاواحد شاي ,
المجموعة:
ولاحد قال تعميرة ولا واحد شاي .
المعلم:
اللي حيطلب رح يقعد.
والل ما يطلبش يبعد .
زبون:
يالابنا نخرج يامسعد شارع الترماي.
يخرجان!
في السيرك
المدرب :
انا شجيع السيمة .
ابو شنب بريمة .
اول ما قول "عالي هوب"
واصرخ لي صرخة
السبع يتكهرب ويبقى فرخه!
حالا بالا سأصارع .
اسد انما ايه؟ متوحش .
وح خلي في وجهه شوارع .
المجموعة: لا لا لا ما يصحش .
المدرب :
اهه جه اهه جه! تسقيفة بأه.
تسقيفه امال ,
تشجيعه اما ل .
تعالى لي يا حبيبي تعالى لي .
خارج القهوة.
الاخر :
اوعد يارب اوعد
آدي كمان قهوة .
الاول :
يللا بنا يامسعد ,
ندخل على سهوه!
في القهوة الثانية
الغازية:
طار في الهوا شاشي
وانتى ما تدراشي .
طرفه شاوري عليك ,
حكم الهوا ماشي .
حكم الهوا ماشي.
هوا العصاري . ياواد
على سطح داري ياواد .
خدني ورماني رماني
عليك هوا العصاري.
آهين ياناري ..منك ياجاري
خدني ورماني رماني عليك هوا العصاري.
صاحب القهوة:
اللي حيطلب راح يقعد
واللي ما يطلبش يبعد.
الزبون:
يالللا بنا نخرج يا مسعد شارع الترماي.
لعبه زق الطارة
صاحب اللعبة:
ورينا القوة .
يابني انته وهوه .
مين عنده مروة
وعاملي فتوه .
يقدر بقداره على زق الطارة ويفرقع بمبه.
شاب:
وسع وسع وسع .
انا ازق الطارة
واضرب ميت بمبه .
دنا الاسطى عمارة
من درب شكمبة .
صيتي من القلعة
لسويقة الللا لا
انا واخد السمعه.
الجميع:
طب يالله تعالى
الشاب:
لاياعم سعيدة .. دي البدلة جديدة.
الجميع:
ها هاهـئا سعيده .. يابو بدله جديدة ..
سيدة:
ياولا د الحلال
بنت تايهة طول كده
رجلها الشمال
فيهاخلخال زي ده .
رجل:
زحمة ياولداه .
كام عيل تاه .
بائع:
فريرة للعيل
الجميع:
دي الليلة الكبيرة ياعمي والعالم كتيرة .
ماليين الشوادر يابا م الريف والبنادر.
********************
الست مرات البيه
دوّبت الجزمه عليه .
قال إيه ..
ما بقاش بيجيب طلباتها جمعيا ليه ؟
اشمعنى ايفون ،
اللى ف لبنان
جوزها انطون
إداها (ترواه مليون )
علشان
سيارة ، و شبشب ، و جونلة ، و يخت ، و يوتيان .
و الست مرات البيه التانى كمان ،
لسه مناقشتهم ، بالليل ، فى البلكون .سايبه العلامات الزرقا تحت عنيه
و اتلم البيه ع البيه ،
و همس بالخطه اليه ،
عملوا المشروع ، و نهوا الموضوع ، بأمان ...
و تمرد قال فى دمشق ، و زيطة ، و شغل جنان .
و زمان .....
قالها خواجه نابليون
يا خبيبي ضرورى ضرورى تفتش ع النسوان
قمت النهاردة الصبح منحرف المزاج
خانقت دبانوشى و شتمته فى سرى و ابتسمت
أنا أصلى لو هاجرت كان حصل انبعاج
فكتمت حلق البير بغطاه الشهير ثم انكتمت
عيل فى سن المدرسة قاللى : يا حاج
و أنا زرت بيت الله لكن ما اسميش كده
و وليه حبلى قالتها تانى .. عقلى وج .
أنا مسيو كيت و كيت يا سيدة
لابس مثقف زى توفيق الحكيم
ببيريه و تلفيحة
أفوت بشكل سليم فرنسى صميم
آخد (كافيه) فى (سان ميشيل) فى باريس على الريحة
و اسرح و اهيم ورا كل تسريحة
و لما فقت من الهيام
لقيتنى واقع يا حرام
فى مقلب الزبالة و الدبان أمم
يتددوا لى بدفء مصرى و يقولولى
قوم يا حاج
ما يقع غير الشاطر يا حاج
و ألف ألف سلامة ليك ...
يا عم الحاج .
الدرس انتهى/
الدرس انتهى لموا الكراريس
بالدم اللى على ورقهم سـال
فى قصـر الأمم المتــحدة
مسـابقة لرسـوم الأطـفال
ايه رأيك فى البقع الحمـرا
يا ضمير العالم يا عزيزى
دى لطفـلة مصرية وسمرا
كانت من أشـطر تلاميذى
دمها راسم زهرة
راسم رايـة ثورة
راسم وجه مؤامرة
راسم خلق جباره
راسم نـار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتـهى
لموا الكراريس ..
ايه رأى رجـال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفـم
دم الطـفل الفـلاح
راسم شمس الصباح
راسم شـجرة تفاح
فى جناين الاصلاح
راسم تمساح
بألف جناح
فى دنيا مليانة بالأشبـاح
لكنـها قلـبها مرتــاح
وساكتة على فعل الأباليس
الدرس انتـهى
لموا الكراريس …
ايه رأيك يا شعب يا عربى
ايه رأيك يا شعب الأحـرار
دم الأطـفال جايلك يحـبى
يقول انتـقموا من الأشـرار
ويسيل ع الأوراق
يتهجى الأسـماء
ويطـالب الآبـاء
بالثـأر للأبـناء
ويرسم سيف
يهد الزيـف
ويلمع لمعة شمـس الصيف
فى دنيا فيها النور بقى طيف
وساكتة على فعل الأباليـس
الدرس انتهى لموا الكراريس
حزَّر فزّر .. واحد ( مِستر ) ،
يصحى من النوم و شّه مزنهر ،
يشرب ( فيتامين ) قبل ما يفطر
يفطر زبده ، و فينو مَقمّر ،
و مربّه ، و بيض بكذا محمّر ،
ثم القهوه لجل يعمّر
ثم لبانه ، ثم يعفَّر ،
ثم يقوم لك كده يتمخطر ،
يكبش أوراق لونهم أخضر
أكوام أكوام ، آخر منظر ..
يملا جيوبه ، و يمشى يفنجر ،
يركب (كاديلاك ) طالعه تزمجر ،
يشرب ( ويسكى ) ملو الأنجر ...
و لا عنده هموم ، و لا متعكر ،
و ف حضرتنا مش بيفكر ،
و إن جت سيره ، لا يتذكر ،
أصله ف نفسه ، و مش متبحّر ،
و لا يعجبهوش اللب الاسمّر ،
غير فى البدله لما بيسهر
... إنما خفه ، و دمه سكر ،
مين بقى هوه ؟ .. مش راح أفسر ،
واضح جدا .. حزّر .. فزّر .[/]
حفلة كوكتيل دبلوماسية
فى منظمة دولية
أصوات دردشة هادية و نشطة
تشبه فقاقيع شبانيا فرنسية
ريحة السيجار العطرية
بعض الازياء الوطنية
بعض صوى المزة
بعض الكئوسات رايحة و جاية
السوفيتى بيشرب طبعا فودكا
الصينى بيتصور جنب الويسكى
و الأمريكى بياكل كافيار حاف
وصل الضيف الاسرائيلى
ذو الضحكة العسلية
سلم على كل البشرية
و استلم الكاس بحماس فنان
و طلب م الكابتن تلج كمان
و شرب و شرب
كأس الانسان فى كل مكان
كأس الرجالة و النسوان
كأس العواجيز و الشبان
كأس اليابان
لبنان
و كمان لبنان
و طلع بالجزمة ع الترابيزة الجانبية
و مشى بالجزمة ع الأكلات الشعبية
و رقع ضحكة و عمل العملة اللى مش هيه
خلى المطرح تواليت
اتكهرب جو الحفلة الرسمية
و اتقال لا لا ........ لا لا .... لا لا ...
دى غلطة فى الاتيكيت
الحدود
واحنا فايتين ع الحدود
مستمرين في الصعوود
اختفى النيل الجميل من تحتنا
و المدن و الريف و أول عمرنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا
باصة مالشباك على البحر البعيد
واحنا داخلين بالأمل عالم جديد
كنت فاكرة يا مصر اني زهقت منك
و إكتشفت إني محال أستغنى عنك
حتى دوشة صوت جيراني
و الزحام وحشوني تاني
بسمة حلوة لطفلة صغيرة
لما كنت أديها حتة سكرة
قبل مانفوتك وحشتينا
يا مصر يا أمنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا
كنت بتذكر و أنا في غاية الأسى
لعبنا الكورة في حوش المدرسة
و الشقاوة واحنا لسة صغيرين
و البراءة و الصحاب الطيبين
لما سألتني اللي جنبي
إنت مصري ؟؟...دق قلبي
إسم زي السحر رفرف عالمكان
زي نسمة مهفهفة بصوت الآذان
أيوة مصريين لآخر
كل نقطة في دمنا
و ابتدى شيء ينجرح جوه الوجود
و ابتدينا أسئلة ملهاش ردود
ميلناميلنا عالشباك نخبي
دمعة فرت مننا
الوجوه من ثلج و عيون من قزاز
شوقي زاد للعشرة و الناس العزاز
و إبتديت أكتب و أنا فوق السحاب
إبتديت يا حبيبي في أول جواب
مصر إنتي حتة مني
مش مجمش مجرد إسم وطني
قالوا فاضل نص ساعة عالوصول
قلت ايه معنى الساعات و الا الفصول
إلا في الأرض اللي فيها
ذكرياتنا و حبنا
و ابتدى شيء ينجرح جوه الوجود
و ابتدينا أسئلة ملهاش ردود
ميلنا عالشباك نخبي
دمعة فرت مننا
رحم الله شاعرنا صلاح جاهين
» موقع اخبارى مميز
» مكتبه الفنان عبده النزاوي
» مكتبه مطرب الكف ياسر رشاد
» مكتبه مطرب الكف - رشاد عبد العال - اسوان
» يلم دراما الزمن الجميل الرائع - أنا بنت مين, فريد شوقي, ليلى فوزي , حسين رياض
» فيلم الحرمان فيروز نيللي
» المسلسل البدوي البريئة
» مسلسل وضحا وابن عجلان