قصيدة جيفارا مات لأحمد فؤاد نجم

جيفارا مات جبفارا مات
اخر خبر فى الراديوهات
وفى الكنايس وفى الجوامع
وفى الحوارى والشوارع
وع القهاوى وع البارات
جيفارا مات
واتمد حبل الدردشة والتعليقات
مات المناضل المثال ياميت خسارة على الرجال
مات الجدع فوق مدفعه جوه الغابات
جسد نضاله بمصرعه ومن سكات
لا طبالين يفرقعوا ولا اعلانات
ما رأيكم دام عزكم يا انتيكات
ياغرقانين فى المأكولات والملبوسات
يادفيانين ومولعين الدفايات
يا محفلطين ياملمعين
يا جيمسات
يا بتوع نضال اخر زمن فى العوامات
ما رأيكم دام عزكم جيفارا مات
لا طنطنة ولاشنشنة ولا علامات واستعلامات
عينى عليه ساعة القضامن غير رفاقه تودعه
يطلع انينه للفضايزعق ولا مين يسمعه
يمكن صرخ من الالم من لسعة النار فى الحشا
يمكن لفظ اخر نفس كلمة وداع لاجل الجياع
يمكن وصية للحاضنين القضية فى الصراع
صور كتير ملو الخيال والف مليون احتمال
لكن اكيد اكيد اكيد ولا جدال
جيفارا مات موتة رجال
ياشغالين ومحرومين
يامسلسلين رجلين وراس
خلاص خلاص ملكوش خلاص
غير بالبنادق والرصاص
دا منطق العصر السعيد
عصر الزنوج والامريكان
والعدل اخرس او جبان
صرخة جيفارا يا عبيد
فى اى موطن او مكان
مفيش بديل مفيش مناص
يا تجهزوا جيش الخلاص يتقولوا ع العالم خلاص